Fagaarayaasha iyo waddooyinka waxaa lagu kordhinayaa dhir iyo nalal
Magaalada Helsinki waxay kobcinaysaa agagaarka saldhigga metroga ee Rastila iyo waddooyinka u dhow, iyadoo ku daraysa agab sagxadeed oo cusub, kuraas iyo qalab kale, dhir iyo nalal. Intaa waxaa dheer, magaaladu waxay dib u habaynaysaa waddooyin kale ee Meri-Rastila ku yaalla si loogu diyaariyo dhismayaasha cusub.
Magaaladu waxay cidhifka fagaaraha ka dhisaysaa xarun ganacsi iyo dhismayaal guryo ah oo cusub. Intaas ka hor, xarunta ganacsiga ee hore waa la duminayaa. Waddada Harbonkatu waxaa laga dhisayaa xannaano carruur oo cusub, taas oo dhammaystirmaysa sannadkan gudihiisa.
Haruspuisto waxaa laga heli doonaa waxqabadyo kala duwan
Magaaladu waxay dib u habayn weyn ku samaynaysaa Haruspuisto oo ah jardiin weyn oo cagaaran. Mawduuca cusub ee jardiinadu waa Badda Baltiga iyo nolosha biyaha hoostooda. Jardiinada waxaa laga samaynayaa goobo ciyaar iyo jimicsi oo loogu talagalay dadka deggan ee da’ kasta leh.
Dib u habaynta Haruspuisto waxay kordhinaysaa raaxada iyo ammaanka deegaanka.
Jardiinada waxaa laga dhisayaa goob jimicsi, gidaar fuulid, goob iskeyt lagu ciyaaro iyo waddo pumptrack ah. Sidoo kale, waxaa jardiinada laga heli doona ciyaaraha biyaha, kubbadda kolayga ee waddooyinka, leexooyin iyo fuulista. Haruspuisto waxay dib u habaynta kaddib xittaa sii lahaan doontaa dhir dabiici ah iyo keyn badan.
Dib u habaynta Haruspuisto waxay bilaabatay sannadkii 2025. Xayndaabka eeyda ayaa beerta laga dhammaystiray sannadkii hore, waxaana hadda la dhisayaa goobta iskeytka. Dib u habayntu waxay soconaysaa ilaa sannadka 2027.
Xarunta hawlaha badan waa goob ay dadka deegaanku ku kulmaan
Iyada oo qayb ka ah dib u habaynta deegaanka, magaaladu waxay sidoo kale qorshaynaysaa inay dib u habayn iyo ballaadhin ku samayso xarunta hawlaha badan ee Meri-Rastila (Meri-Rastilan monitoimitalo). Shaqadu waxay bilaabanaysaa sannadka 2027, dhismuhuna wuxuu dhammaystirmayaa sannadka 2029.
Dugsiga hoose-dhexe, xannaanada carruurta iyo xarunta dhalinyaradu waxay hawlahooda ku sii wadanayaan goobaha dib loo cusboonaysiiyay. Intaa waxaa dheer, dhismaha waxaa laga dhisayaa goobo ciyaar oo gudaha ah, maktabad iyo goobo jimicsi.
Xarunta hawlaha badan waxa kale oo ku jiri doona goobo ay dadka degaanku isticmaali karaan iyaga oo aan isdiiwaangelin ama sii qabsan wakhti.
